Primeira xuntanza entre Concello, Xunta e Goberno central para a posta en marcha do Plan de Sostibilidade Turística de Santiago

No mes de novembro de 2020 celebrouse a primeira xuntanza para poñer en marcha o Plan de Sostibilidade Turística. O alcalde de Santiago, Xosé Sánchez Bugallo, recibiu no Pazo de Raxoi o secretario de Estado de Turismo, Fernando Valdés Verelst, e o vicepresidente primeiro da Xunta de Galicia e conselleiro de Presidencia, Xustiza e Turismo, Alfonso Rueda, co obxecto de comezar a traballar na posta en marcha do Plan de Sostibilidade Turística de Santiago. Á xuntanza tamén asistiron o delegado do Goberno en Galicia, Javier Losada, e o concelleiro de Turismo, Sindo Guinarte.

Na reunión transmitiuse o compromiso tanto do Goberno central como da Xunta de Galicia co Plan de Sostibilidade Turística elaborado polo Concello de Santiago, que ten como principal obxectivo transformar o modelo turístico de Santiago, fomentando un modelo no que se conxugue a rendibilidade turística sostible do sector e a convivencia de turistas e visitantes cos residentes.

O Plan de Sostibilidade Turística de Santiago, que se desenvolverá de 2021 a 2023, conta cun orzamento total de tres millóns de euros, cofinanciados a partes iguais por Concello, Xunta e Secretaría de Estado de Turismo. Con este plan, o Concello aposta pola transformación do sector turístico incorporando o dito compromiso de investimento nos orzamentos dos próximos tres anos.